Mike se klipskerm

 

Terwyl die eerste volmaan van 2017 oor Vanwyksvlei bo ‘n dik bank wolke uitbeur, strooi Heila en haar familie Mike se as by sy geliefde klipskerm op sy plaas Goeiehoop – die plaas wat hy so hartstogtelik liefgehad het.

img-20170113-wa0001

Mike se geliefde grond op Goeiehoop

 

 

Vanoggend gedenk die dorp Mike se lewe. Op versoek word Amazing Grace gespeel, soos gesing deur Nana Mouskouri. En daar is vir my op ‘n manier ‘n sterk ooreenkoms tussen Mike se lewe en John Newton s’n – die skrywer van die lied wat eens ‘n slawehandelaar was en God nie geken het nie. Want Mike het ook eers ander paaie geloop voordat hy sy God leer ken het. Het ook in die spreekwoordelike gutter beland; sonder werk en sonder blyplek. Oorleef van ‘n broodjie wat ‘n kleurlingvrou elke dag vir hom gebring het en so geleer het wat genade beteken.

20170113_110052

Op nuwejaarsdag sit Mike en Heila voor my in die kerk. Johan praat oor Appie wat op nuwejaar sou verjaar en nie meer met ons is nie. “Ons weet nie een of ons volgende jaar nog hier sal wees nie” is Johan se woorde. Presies ‘n week later sterf Mike Holtzhausen aan Kongokoors.

Toe ons Mike die eerste keer ontmoet, steek hy sy hand uit na Johan. “Ek is nou nie juis ‘n gereelde kerkganger nie, Dominee” was sy woorde. Want kerkgang was nie vir Mike gelykstaande aan godsdiens nie. Sy godsdiens het hy uitgeleef deur om te sien na mense wat nood het. Sy bakkie vol groente vanaf die plaas in die gange getrek en uitgedeel. Uit sy vrieskas gehaal en gesorg dat die mense hoër op in die straat kos het. Want hy was ook eens dáár waar hy nood goed leer ken het. Mike se godsdiens was ook om hom te onttrek na sy geliefde klipskerm om met sy God te gaan praat. Versterk teruggekom na sy afsondering met sy Heiland.

Vroeër jare het Mike en Heila die hotel op Vanwyksvlei bedryf. ‘n Kranige kok was hy. Mike het Heila (toe reeds weduwee na haar eerste man se dood) op die dansbaan ontmoet – het graag vertel hoe lekker hulle twee kon dans. Mike het ‘n pa geword vir haar kinders en ‘n geliefde oupa vir hulle kleinkinders. Hulle was 14 jaar getroud

img-20170113-wa0003

Heila met al haar kinders, Mike se kinders en hulle kleinkinders

 

As Mike jou genooi het vir ‘n braai, moes jy jou regmaak vir oordaad. Met hout was hy nie suinig nie en nog minder met vleis. Hy’t geweet hoe om ‘n vuur te maak, kole te lees en hoe om te BRAAI.

“En toe los Meneer Mike ons” vertel ‘n werker in die dorp van Mike se dood. Want wie het hom dan nié geken nie. Groot ou Mike met die klein-klein hartjie. Mike wat met sy bulderende stem in g’n onduidelike terme iemand presies die leviete kon voorlees as hy sou droogmaak. Mike wat vir jou kanne vol lekker windpompwater vanaf sy plaas voor jou deur kom los. Mike wat saans op sy staptogte in die dorp aandoen by hulle wat hy weet alleen is – met sy stapstok aan die venster kom tik net om te kom hoor of als reg is. Of die vreemde kar wat voor die huis staan kennisse of indringers is. Wat net gou kom inloer om te hoor hoe dit gaan.

Dat ‘n klein, rooi bosluisie so ‘n groot, sterk man se lewe so vinnig kon wegvat!

Mike, daar het ‘n yslike sinkgat ingeval in Vanwyksvlei. Een wat nooit opgevul sal kan word nie. Nie eens met al die baie klippe van jou klipskerm nie.

Advertisements

4 comments

  1. ekmyselff · January 14, 2017

    Mooi geskryf. Klink na n besonderse mens.

    Like

  2. Elna Bekker · January 15, 2017

    Ek tjank nou so lekker, want Mike klink soos een van my mense! ‘n Reuse groot sinkgat -inderdaad. Jy skryf so ryk Leonette. Dankie dat ek dit mag lees.

    Like

  3. Connie Heese · January 15, 2017

    Dankie Leonette. Beskrywend mooi. Mike was beslis ‘n merkwaardige man.

    Like

  4. Franlie Lexow · January 16, 2017

    So mooi!!

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s